Er rétt að semja án þjóðaratkvæðagreiðslu?

Ég er búin að sveiflast mikið undanfarið í því hvort að við eigum að semja að nýju og draga lögin til baka eða láta samninginn fara í þjóðaratkvæðagreiðslu. Ég held að ég sé komin á þá niðurstöðu að fyrir Íslendinga verði affarasælast að setja málið í þjóðaratkvæðagreiðslu og helst að hafna samningnum með afgerandi meirihluta. Það myndi rýmka mjög um samningsstöðu okkar, lappa upp á sjálfsvirðinigu þjóðarinnar og geta orðið til þess að þjóðin standi saman að því að finna sameiginlega samningsforsendu.

Besta samningsforsendan af mínu mati væri sú að viðsemjendur okkar hirði Landsbankann og sjái sjálfir um að eltast við fyrrum stjórnendur hans. Það væri réttlátt niðurstaða fyrir alla hlutaðeigandi.

Varðandi þjóðaratkvæðagreiðslu og hik mitt hingað til var ég að velta fyrir mér flokksræði, þingræði og Stjórnarskránni. Er umboðið í Stjórnarskránni neitunarvald til Forsetans og þingið geti þá skotið þessu til þjóðarinnar til að fá neitun hans hnekkt eða dregið frumvarpið til baka, eða er þetta málskotsréttur þjóðhöfðingjans sem er síðasti varnaglinn um rétt kjósenda þar sem hann getur spurt raunverulegu eigendur atkvæðanna ráða þ.e. kjósendur sjálfa?

Hver svo sem raunverulegur skilningurinn var að baki setningu 26. greinarinnar er mér orðið alveg ljóst að þessi möguleiki kjósenda til að stöðva Ríkisstjórn á rangri vegferð þarf að haldast í nýrri Stjórnarskrá. Eitthvað verður að hindra flokka í að fá atkvæði með ákveðnum loforðum og stefnum frá því að fara svo fram með þveröfugar ákvarðanir og ofbeldi gegnum þingið. Ef þessi varnagli verður áfram mun það kalla á vandaðri vinnubrögð Stjórnvalda í framtíðinni, byggja upp samvinnu og betri undirbúningsvinnu á mikilvægum málum sem snerta þjóðarhag í framtíðinni.

Fagna samstöðu um Icesave

Handbremsa á hagkerfið?

Þetta eru ótrúlegar afturfarir. Það sem mun gerast er að fólk mun leita leiða til að losna undan þessu með brottflutningi, svartri starfsemi eða draga úr vinnu og frumkvöðlastarfsemi. Öryrkjar og aldraðir munu forðast að geyma peninga á bankareikningum því þeir koma til með að lækka bætur. Núna hefði verið fínt tækifæri til að hugsa alveg út fyrir kassann og gleyma pólitískri réttsýni. Hægt væri að afnema persónuafslátt og setja flatan 15 - 20% skatt á alla. Hækka lægstu laun og örorku um skattprósentuna. Svona yrði til aukið fjármagn í umferð sem færi í kaup á þjónustu og neyslu. Það yrði atvinnuhvetjandi og kæmi hjólum atvinnulífsins af stað. Síðan hefði mátt hækka virðisauka töluvert á ónauðsynjavarning þannig að þeir sem geta verslað slíkan varning borgi neysluskattinn á þann hátt. Þetta yrði til þess að neðanjarðarhagkerfið kæmi upp á yfirborðið því það tæki ekki að svíkja undan skatti lengur auk þess sem allt kerfislægt eftirlit og búrakratían yrði öll mun ódýrara vegna einfaldara kerfis. Skattleggja svo séreignalífeyrissjóð inn og jafnvel allar lífeyrissjóðsinngreiðslur. Skil ekki af hverju lífeyrissjóðirnir eigi að fá að sýsla með skatthlutfall ríkisins í áratugi þegar Ríkissjóði vantar lausafé núna. Ótrúlegar afturfarir!

Skattahækkanir koma verst niður á millistéttinni

Nei hættum nú alveg!

Ég segi enn og aftur að Svandís Svavarsdóttir er án vafa versti umhverfisráðherra sem þessi þjóð hefur átt og höfum við þó úr góðu úrvali að velja. Hún ein síns liðs hefur tekist að rústa stöðugleikasáttmálanum þar sem sagt er skýrum stöfum að ryðja skuli hindrunum úr vegi uppbyggingar álvers í Helguvík og fleiri verkefnum. Hún hefur uppfyllt þann samning með því að leynt og ljóst setja beinar hindranir í veg fyrir atvinnuuppbyggingu allt að 4000 manna. Þetta er bein aðför að atvinnulausum á suðurnesjum sem dæmi.

Nei nú bætir hún um betur og stofnar heimskaffihús þar sem öfgafull umhverfisungmenni fá eyru hennar í stað öskrandi íbúa á Suðurnesjum og á Húsavík og fleiri aðilar svo sem aðeins sjálf Verkalýðshreyfingin á Íslandi og Samtök Atvinnurekenda. Þá neitar hún að sækja um undanþágu til handa Íslandi þrátt fyrir að góðir fulltrúar Sameinuðu Þjóðanna hafi bent á að Ísland geti hjálpað með því að hafa stóriðju sem nýtir endurnýjanlega orku í stað kolaspúandi verksmiðja annarstaðar. Engu er líkara en Svandís trúi því staðfastlega að við séum með sérlofthjúp og getum framfleytt okkur á fallegum hugsunum a la íbúa Hálsaskógar. En reyndar ætla þau öll að vera vinir svo okkur hlýtur að mega vel líka eða hvað?

Já svei, enn og aftur.

Ungmenni til ráðgjafar

Þrjú hjól undir vagninum?

Það hlýtur að teljast alveg ótrúleg uppákoma að Jóhanna skili þessari greinargerð beint í fjölmiðla. Öruggt má telja að þessi aðgerð hafi ekkert með það að gera að allt skuli upp á borðið og gegnsæi ríkja. Nei þetta er hótun til VG sem sýnir ótvírætt að Jóhanna skirrist ekki við að eyðileggja samningsstöðu Íslands til þess að fá tækifæri til hótana. Jóhanna hefur aldrei kunnað annað til að fá sínu framgengt en að skella hurðum og hóta. Ég segi enn og aftur; Guð blessi Ísland.

Akkúrat núna hangir þessi stjórn á tönnunum og mun ekki sleppa fyrr en allt er orðið rjúkandi rúst eða allt liðið orðið tannlaust. Hvort sem fyrr verður. Ógæfa Íslands er að í þessari ríkisstjórn eru margir óhæfir en þær stöllur Jóhanna og Svandís sínu verstar. Þær munu einar síns liðs geta eyðilagt ótrúlega mikið. Þær munu óáreittar eyðileggja enduruppbyggingu landsins, atvinnutækifærum, aðkomu erlendra fjárfesta og framtíð Íslands hvorki meira né minna með dyggum stuðningi raunverulega fjármálaráðherrans hans Indriða. Það hlýtur að vera farið að fara um félagsmenn Samfylkingarinnar hvað varðar áframhaldandi samstarf og óhæfan leiðtoga. Jóhanna hefur enga leiðtogahæfileika, Svandís hefur ein síns liðs sett hindrun í uppbyggingu allt að 4000 starfa, Indriði ætlar að skattleggja okkur út úr allri alþjóðlegri samkeppni og hefur gleymt að í fjárlögum þarf líka að gera ráð fyrir tekjum. Allt þetta verður meðan Steingrímur er upptekinn af því að leika forsætisráðherra.

Ja svei ykkur, Róm er að brenna.

Titringur vegna greinargerða

Þetta er ekki gott

Þóroddur, prófessor við Háskólann á Akureyri telur að það geti verið gott fyrir Ísland að á skelli fólksflótti. Hvernig má það vera að maðurinn telji þennan fólksflótta af hinu góða? Hverjir hafa mestu möguleikana á að flytjast úr landi? Jú það er menntafólkið sem er eftirsótt og mestu skattgreiðendurnir. Ég fyllist skelfingu við þá tilhugsun að ef um tíu prósent þjóðarinnar flytur teljast það um þrjátíu þúsund manns! Líklegt má telja að þeir fullorðnu í þeim hópi komi að mestu úr hópi hinna sjötíu þúsunda sem halda uppi velferðarkerfinu á Íslandi með sköttum sínum. Aðrir hafa lítið að sækja til útlanda nema þá menntun og nú er hagstæðara að mennta sig á Íslandi meðan gengið er svona.

Óþarfa áhyggjur?

 

Ég hef verið að fylgjast með umræðunni um skurðstofur Heilbrigðisstofnunar Suðurnesja og þeim úlfaþyt sem upp hefur komið varðandi þetta mál.  Margir hafa komið í fjölmiðla og lýst skoðunum sínum eða bloggað stíft og harðort um þessar skurðstofur.

Oft hefur manni fundist að málið sé leitt í villugötur og gefið í skyn að þessi leiga á aðstöðu gæti orðið til þess að innlendum almenningi og þá suðurnesjabúum verði vísað frá þjónustu. Þetta er mikill misskilningur því að málið fjallar um það hvort að opinber stofnun líkt og HSS geti fengið að auka tekjur sínar með því að leigja frá sér ónýtta tíma á skurðstofum og þjónustu kringum þessar aðgerðir s.s. með vinnu skurðteymis síns.

Hér reka margir upp ramakvein en það sem almenningur virðist ekki vita er að biðlistar í íslenska heilbrigðiskerfinu eru ekki til komnir vegna þess að skortur er á læknum, læknateymum, skurðstofum eða öðru en því að það eru til takmarkaðir peningar. Biðlistar koma vegna þess að ríkið kaupir ákveðið margar aðgerðir af annarsvegar spítölum og hinsvegar sérfræðingum með einkastofur. Það er í raun umframgeta í kerfinu sem líklega eykst enn núna þegar niðurskurður er framundan. Þessi takmörkun á aðgerðum skapar meira en biðlista, hún skapar líka erfiðari aðstæður fyrir skurðlækna til að reka skurðstofur sínar og mannskap stóran hluta ársins og enn frekari samdráttur slíkra aðgerða er að öllum líkindum að verða til þess að á skelli landflótti þessara aðila.

Nú segja margir, að opinberar stofnanir eigi ekki að taka þátt í innflutningi sjúklinga en skoðum hvað gæti gerst ef Heilbrigðisráðherra bannar stofnunum að drýgja tekjur sínar á þennan hátt. Ég vil fá að bæta því við að í áratugi hafa sjúkrahús á landsbyggðinni fengið að leigja sérfræðingum aðstöðu og því skrítið þetta upphlaup allt í einu nú en skoðum málið:

Ef opinberar stofnanir fá ekki að drýgja tekjur sínar með því að leigja frá sér þjónustu og aðstöðu í umframgetu getur þetta orðið til þess að stór innlendur, nú eða erlendur aðili/aðilar stofni sjúkrahús með hóteli, kemur sér upp fullkomnum skurðstofum, færir  allar tekjur sínar í evrum og dollurum og ræður til sín besta fólkið frá íslenskum sjúkrahúsum og enginn fær neitt við ráðið enda heyrir slík stofnun ekki undir Heilbrigðisráðherra. Arðurinn færi úr landi hjá erlendum aðilum. Sjúkrahúsin verða þá með lélegri samkeppnisstöðu um starfsmenn og tækjabúnað.

Ef opinberar stofnanir fá að drýgja tekjur sínar með svona útleigu á ónýttum björgum getur stofnunin aukið tekjur sínar og þannig veitt starfsfólki sínu betri hlunnindi, aðstöðu og innlendum almenningi betri þjónustu. Þær verða samkeppnishæfari við einkarekin bákn á  þessu sviði og þetta gæti frekar orðið til þess að læknar starfandi erlendis snúi heim nú eða hindrað fólksflótta þeirra úr landi. Þetta síðasttalda á reyndar líka við um einkarekstur á þessu sviði samkvæmt reynslu annarra þjóða.

Hvað er lækningatengd ferðaþjónusta? - þetta er innflutningur á sjúklingum sem oftast bæta ferðalögum og afþreyingu við dvöl sína að lokinni læknismeðferð og koma með ættingja og vini með sér til landsins. Þannig verður til mikill virðisauki á gjaldeyri sem þetta fólk kemur með til landsins, enda sýna rannsóknir að svona ferðamaður eyðir að jafnaði fimm sinnum meira meðan á dvöl sinni stendur en venjulegur ferðamaður. Ennfremur eru þessir ferðamenn síður að sækja  ferðalög á viðkvæma staði á hálendinu en venjulegir ferðamenn. Þetta geta verið sjúklingar, sendir af sjúkratryggingum viðkomandi landa, vinnuveitendum eða bara á eigin vegum. Þetta er vaxandi iðnaður og í þessu eru miklir tekjumöguleikar enda virðumst við Við íslendingar höfum ekki efni á að nýta okkur ekki þessi tækifæri til verðmætasköpunar, hvorki hvað varðar gjaldeyriságóða né vegna mögulegs taps á mannauði úr heilbrigðisgeira. Ég legg því til að stórnvöld hlutist til um það að opinberar stofnanir verði sjálfseignarstofnanir, fái föst fjárlög miðað við fólksfjölda sem þær þjónusta og geti ráðið tll sín hvort heldur verktaka eða launamenn, beri ábyrgð á sinni tekjuöflun að hluta til sjálf og fái að halda öllum ágóða sem þær fá til að geta veitt betri þjónustu, fá betri mannauð og til tækjakaupa og viðhalds.

Að lokum vil ég árétta að samkvæmt tölfræðinni hefur þeim þjóðum sem best gengur í  þessum geira farið á markaðinn með góðri aðstoð og samvinnu stjórnvalda. Tekið er tillit til þess í þessum löndum að í þessari þjónustugrein þarf að geta tekið hraðar ákvarðanir því samkeppnin er mikil en líka eftir miklu að slægjast. Tveir aðilar hugsa sama hlutinn en sá sem framkvæmir fyrst fær samkeppnisforskotið.

Síðast en ekki síst þarf að tryggja það að allar stofnanir sem þátt taka í að veita svna þjónustu skuli ávallt hafa þarfir innlendra þegna í fyrirrúmi og skulu þeir ganga fyrir að allri grunnþjónustu.

Lítla Ísland var "Bitch Slapped Around" segir hollenskur almenningur!

Ég skil ekki hvernig Steingrímur og Jóhanna geta ætlast til að stjórnarþingmenn muni samþykkja þessar ríkisábyrgðir hvað þá stjórnarandstöðuþingmenn. Ég tel það jaðra við landráð að skuldsetja þjóðina þvert gegn vilja hennar og efast stórlega um að stjórnarskrá heimili þeim þetta. Landsmenn skilja nefnilega að það er í raun verið að samþykkja samninga sem ríkið hefur enga möguleika á að standa við og að ríkisábyrgðirnar munu falla á okkur og þá án þess að þjóðin hafi nokkra réttarstöðu.

Ef við eigum að greiða þetta til þess að kaupa okkur frið verður að gera viðsemjendum okkar ljóst að þessi stjórnvöld hafi ekki heimild til þess að semja þannig að innviðir þjóðfélagsins hrynji og það á allra næstu mánuðum. Ég gæti sæst á að við borgum gegn því að bretarnir dragi frá fjármagnstekjuskattinn sem þeir höfðu út úr þessu og að svo verði aldrei meiri afborganir en svo að það fari í 1% af vergri þjóðarframleiðslu þar til umsamið gjald er uppurið. Best væri að þar sem þeir tóku Landsbankann hirði þeir hann og allar hans skuldir og ábyrgðir.

Ég hef orðið þess áskynja að fólk er farið að horfa ansi mikið til útlanda og það er ekki aðeins fólkið sem er atvinnulaust og fjölmargir sem ég þekki ætla ekki að mótmæla á Austurvelli heldur fara beint og kaupa sér farmiða ef þetta verður samþykkt því þetta er flest menntað fólk sem veit að Ísland verður þriðja heims ríki í áratugi ef þetta verður samþykkt.

Því bið ég stjórnarþingmenn þess lengstra orða að tryggja það að áður en þeir ýta á Já bjölluna krefjist þeir utanaðkomandi sérfræðimat á þessum samningi og skyldum Íslands. Ellegar munu þeir ekki eiga sér viðreisnar von í þessu samfélagi. Ríkisstjórn Sjálfstæðisflokks og Samfylkingar flutu sofandi fram af hengifluginu en þessi ætlar að standa á hamarbakkanum og stökkva! Hvort er verra? Eigum við íslendingar ekki betra skilið?

Hvernig svo sem ég lít á þetta þá snýst þetta ekki um hægri eða vinstri, mitt eða þitt heldur að við urðum sem þjóð fyrir arðráni innanfrá og svo árás erlendis frá. Ekki með byssum og sprengjum, nei heldur fjármála, viðskipta og alþjóðlegri pólítískri árás þar sem vinaþjóðum okkar vantaði sökunaut. Hvað gerir heilvita þjóð undir árás? Jú hún stendur saman sem einn maður en slítur ekki hárið af næsta manni af því hann hefur aðrar skoðanir.

Ég segi bara að guði sé lof að Steingrímur og Jóhanna voru ekki við völd þegar við færðum landhelgina úr 50 mílum í tvö hundruð. Þau hefðu ekki aðeins bakkað undan þrýstingnum,nei þau hefðu farið aftur í 12 mílurnar og boðist til þess að greiða skaðabætur á skipum og tekjumissi í Bretlandi. Svei!

Það eru allavega til þingmenn í Vg sem virðast ekki lyddur og hræðslupúkar, hvað með Sf?

Strandi Icesave, strandar allt

Þegiði og borgið!

Steingrímur segir að fólk átti sig ekki á því að vextir á skuldum þjóðarbúsins muni sliga þjóðina á næstu misserum. Hann virðist engan veginn gera sér grein fyrir því að vextirnir eru nú þegar að sliga heimilin, 380% fleiri heimili en í haust! Ef ekkert verður að gert mun almenningur ekki sjá sér neinn hag í að reyna áfram og hverfur á braut, þ.e. þeir sem það geta, hinir munu sitja eftir í súpunni. Það munu verða öryrkjar, gamalmenni og fólk sem ekki kemst í burtu einhverra hluta vegna sem mun halda uppi fjöldanum. Hverjir eiga þá að borga fyrir vextina, neysluna, heilbrigðiskerfið, menntakerfið og félagmálakerfið? Ef almenningur á að borga, verður að tryggja að hann geti það. Það verður að leiðrétta vísitöluna og lækka vextina hratt! Fjöldi manns sem ég þekki, sérstaklega menntafólkið, er farið að horfa í kringum sig, athuga með dvalarleyfi og kynna sér kosti þess að flytja í burtu. Ótrúlegasta fólk sem ég hefði seint haldið að væru að íhuga flutning. Ekkert af þessu fólki er atvinnulaust!

Framsóknarmenn í afneitun

Býrðu í hjartanu eða höfðinu á þér?

Þessi frétt leiðir hugann að nokkru sem mér var sagt fyrir löngu þ.e. að vinstrasinnað fólk búi í hjartanu á sér en hægra sinnað fólk í höfðinu. Mér fannst þetta ákaflega fyndin staðhæfing en hef oft hugsað til hennar síðan. Því hef kynnst svo mörgum hörðum vinstri mönnum sem mér finnst áberandi að taka ákvarðanir meira út frá tilfinningum en skynsemi. Sömuleiðis síðan fundist áberandi hvað hægri harðir taka oft ákvarðanir byggðar á skynsemi og hlusti stundum lítið á hjartað á sér.

Málefni og traust skiptu mestu

Hvað er satt og rétt?

Samkvæmt þessari ályktun Árna Johnsen er ég sek þó ég sé ekki frambjóðandi. Ég, líkt og fjöldi annarra sjálfstæðismanna hvatti fólk til þess að kjósa flokkinn. Mjög margir viðmælendur höfðu á orði að ef hinir eða þessir aðilar væru ekki í framboði myndu þeir kjósa flokkinn en ætluðu ekki að gera það vegna þeirra. Hiklaust, hvatti ég þetta fólk til þessa að nota útstrikanir frekar en að kjósa aðra flokka  þvert á skoðanir sínar og bennti fólki á að það væri réttur þeirra sem kjósenda að strika út. Þetta þýðir ekki að maður hafi talað niður frambjóðendur.

Árni getur ekki skellt skuldina á sína meðframbjóðendur fyrir mikla óánægju kjósenda með Sjálfstæðisflokkinn. Aldrei hef ég heyrt frambjóðendur hvetja flokksmenn eða kjósendur til að strika út ákveðna menn. Hitt er sjálfsagt að benda kjósendum á að útstrikanir séu kostur frekar en að kjósa aðra flokka.

Árni hefur verið afspyrnu duglegur í flokksstarfi og lagt ómælda vinnu fram fyrir hann og hefur aflað sér vinsælda flokksbundinna fyrir. Hitt er annað að almennir kjósendur hafa ekki áhuga eða vitneskju um slíkt. Fjölmiðlar hafa farið hamförum gegn flokknum í kosningabaráttunni og í því ljósi eru ákveðnir einstaklingar erfiðari en aðrir til að hafa í farteskinu. Árni ætti því að beina reiði sinni gegn þeim en ekki samflokksmönnum sem margir gáfu honum góða kosningu í prófkjörinu.

Fásinna að útstrikanir hafi verið skipulagðar í Árborg